وكتير من الاباء والامهات بيحبوا يتاملوا اطفالهم بالساعات ومابيزهقوش
حاجة غريبة قوي بتحصل جوه الواحد لما بيشوف حاجة منه واقفة قدامه
حاجة فيها روح وبتحرك وبتلعب وتزعل وبتعيط وتفرح وتضحك
كوكتيل مشاعر غريب بيحس بيه في لحظتها بيبقى لسانه عاجز عن انه يوصف الكوكتيل ده
فقط بيتامل الحاجة اللى منه
كتير قوي بنسمع عن اب او ام يقولك بص بص ابني لما عمل الحركة دي دانا بعمل كده بالظبط دانا لما ببوز بيبقى شكلى عامل كده دانا زمان وانا صغير كنت لما اكدب بيبقى وشي عامل كده او بعمل الحاجة الفلانية
مش عارفة دي جينات ولا ايه بس اكيد مشاعر الشخص لما يلاقى نسخة منه صغنونة اكيد مشاعر مختلفة مبيفكرش ساعتها ايه السبب ولا الحكاية دي ترجع لايه
المهم انا بتكلم في الموضوع ده ليه انا لسه يعني مخلفتش لاني لسه متخطبتش حتى بس اصل انا لقيت الحتة بتاعتي اللى مني
اه بجد والله
بقى لي امورتي الحلوة اللى بقت طعمة واللى ليها سحر تاني غير اللى قالت عليه الشحرورة خالصسحر غريب كده بجد وغلاوة كده ملهاش حد
بنوتي الحلوة هي بنت خالى
مقربناش من بعض غير من كام سنة
في الاول مامتها كانت تقولى دي طالعالك في شوية حاجات
او تقولى دي مريم بتعمل كزا اقولها عادي ياطنط انا كنت كده وانا صغيرة
لكن ده في الاول بس
لكن مريم دلوقتى تفكيرها عمال بيكبر
واحنا عمالين بنقرب اكتر واكتر مش هقول التفكير زي التفكير مش شرط ( مع ان التفكير زي التفكير
لكن لما تلاقى نفس التصرفات نفس التعبيرات نفس التعليقات نفس الحركات نفس الخناقات نفس ونفس ونفس ونفس
وفي الاخر بلاقى نفسي واقفة بتتكلم وتتحرك
اكيد مريم ليها شخصيتها وليها اختلافاتها عني بس انا مبشوفش غير انها منى
في الاول قلت اخلينا معاها صحاب عشان لو اقدر انصحها او افيدها من غير ماتبقى هي حاسة باني بعمل كده وبعدين
ابتديت احس انها اختى ومسئولة مني ومؤخرا بقيت احس اني امها ( ربنا يخليلها مامتها طبعا
دلوقتى وانا في السن ده لقيت بنتي اللى انا مسئولة جزئيا عنها وقدر على قدر الامكان اني ساعات اعمل دور الصاحبة وساعات الاخت وساعات الام
لكن ياترى لو لي بنت مسئوليتها التامة مني هاقدر افصل بين الادوار دي ولا لأ؟؟
مش عارفة وهاسيب الاجابة لوقتها
لاني اصلا كاتبه الموضوع ده عشان اعبر عن حبي وفرحتي ليها
هو اللي قلب جد لوحده
:):)
وامورتي الحلوة بقت طعمة بقت طعمة ولها سحر جديد