ليه دايماً أحلامنا لازم تكون عادية؟؟
ليه لما نكون في ثانوية عامة يبقى حلمنا نجيب مجموع عالى وبس؟؟ليه مبيكونش جمبيه حلم تاني ؟؟او ليه الواحد ميكونش حلمه انه يبقى رياضي محترف ويبقى مجاله مثلاً ؟؟
ليه لما الواحد يبقى في كلية يبقى حلمه انه يعدي السنة ويستمتع بحياته في الكلية ؟؟ او حتى لو كان من المتوفقين والأوائل يبقى حلمه بس اطلع من الأوائل واتعين في الكلية؟؟
ليه لو حتى في أحلام تانية نفس الواحد يحققها بعد مايتخرج مبيقاش شايف غير حلم واحد أجيب فلوس عشان اتجوز؟؟
وليه بيلغي كل الاحلام التانية لغاية لما يحقق ده زي ماتكون دي هاتبقى عائق ؟؟
وليه لما يتجوز برضه بياجل نفس الاحلام عشان عايز يجيب العربية ؟؟
ياااااااه جه أول عيل يلا نبتدي نحوش
التاني ..
التالت..
بتحلم بأيه؟؟؟؟؟؟؟؟؟؟؟؟؟؟؟؟
أجوز العيال واكبرهم ومخليهمش ناقصهم حاجة
هابينلهم العمارة
هاحطلهم فلوس في البنك
هاجزههم احسن جهاز
ايه ده يعني معاك فلوس في البنك ؟؟؟؟
اه باعم بس دي بتاعت العيال استحالة امد ايدي عليهم
بس انت معاك فلوس كتير ممكن تعمل اللى كان حلمك زمان وتكبر الفلوس دي وتبقى ضعفين
خلينا في المضمون يعني اخد الفلوس واضيعها افرض مانجحتش؟؟ العيال خلاص اتجوزت اخبار حلمك ايه ؟؟؟؟ ايه حلم حلم ايه ياعم مش لما اسد الديون اللى على بس اهم حاجة اني جوزتهم احسن جوازات عقبال يارب لما اشوف عيالهم
ليه الواحد بيحلم دايما باحلام عادية ؟؟؟ زي كل الناس زي كل اللى حواليه ؟؟؟ مش المفروض ربنا مميز كل واحد بقدرات ؟؟؟ والقدرات دي يقدر يحقق بيها مع ارادته كل اللى يتمناه
ليه الواحد لما يكون عنده احلام غير اعتيادية يحاول يموتها جواه يعني معقول انا هابقى عندي فيلا يعني انا معقول هاطلع زي زويل ؟؟؟
طب عايزة حد يديني سبب واحد ان ليه مش معقول؟؟؟
هل الناس اللى احلامهم غير اعتيادية قبل مايوصولوا لحلمهم سالوا نفسم هو معقول ؟؟ ولا اشتغلوا بجد وكان عندهم ايمان وثقة بنفسهم انهم يقدروا يحقووا الحلم ده
كان أ/محمود بركة في ندواته في الكلية عندنا قال كلمة حلوة قوي حلمك ايه ؟؟ تتخرج وتشتغل وتجيب عربية وتجوز العيال وخلاص على كده ؟؟؟ مبروك الف مبروك انت كده زي 70 مليون وفي 70 مليون نسخة منك اللى عايزة اقوله ان الاحلام الغير اعتيادية هي اللى بتحقق كيان الانسان لو وصلها هي اللى بتكتب اسمه من حروف من نور
احلموا
واحلموا
بس احلموا باحلام غريبة
ماتبقوش عاديييييين :)
|
