اخر بوست لي كان بيفتح موضوع تعدد الزوجات للرجل بس مش عامة لا ده تعدد الزوجات للراجل اللى مش شايف اي عيب في مراته الاولانية وبيحبها وكل حاجة بس هو بس نفسه يتجوز تاني وخلاص !!!!! وكان نفسي اعرف رأي النص الآخر في الموضوع ده لانه بصراحة كان مستفزني جدا حتى كنتوا تلاحظوا كده في اسلوب كتابتي للبوست الاخير
انا هاحط الكومنتس اللى جاتلى واعقب عليها والسبب اني بعملهم في بوست ومردتش في الكومنتس اني حسيت انه مهم للناس تعرف بقى الرأي الآخر عامل ازاي
اولاً
تعليق فنان مسلم:
أعتقد ان الموضوع يصعب جداً شرحة , لأن النساء عمرها ماهتقدر تحس أو تفكر بنفسية الرجل أو العكس.الموضوع سببه فرق سيكولوجي جذري وجوهري بين الراجل والست الراجل ربنا خلقه عنده قدرة انه يحب أكتر من امرأة في نفس الوقت , مع الاحتفاظ بجدران فولاذية تفصل بين حياته العاطفية مع كل امرأة وأخرى وهذا ما لن تشعره المرأة أبداً , لان عقلها ونفسيتها وطبيعتها التي خلقها الله عليها مختلفة , وستنظر للموضوع من منظورها هي وتقارنه بنفسها و ماتشعر به , وهو انها لايمكن أن تحب أكثر من رجل في وقت واحد , الا اذا استبدل رجل بأخرربنا لم يعطي حق التعدد للرجل الا اذا كان يعلم (أكثر مننا جميعاً) انه يمكن للرجل أن يمارسه بدون ظلم , وبدون اجحاف في حق المرأة .. لأن ربنا لا يظلم أحد
تعليق أحمد هتلر:
اولاً مساء الخيرثانيا معلش دخلنا البلوج كده من غير احم ولا دستور منها لله دون دون بقى ..ثالثا فكرتيني ببريد الجمعه والاهرام وعبد الوهاب مطاوع الله يرحمه رابعا بقى وهوه الاهم فى الموضوع النموذج ده نمطي وبيتكرر كتيربس اكيد طبعا الراجل عنده دافع للجواز وانا منكرلوش ده وبعدين الراجل بيحبها واحنا لسه مش قادرين نستوعب فمجتمعنا الفرق بين الحب والجواز .مينفعش طبعا نخليها قاعده عامه ان الراجل بيبقى عنده ميل لتعدد الزوجات بالعكس اعتقد الراجل برضه بيدور على الاستقرار ودي مش قاعده اكيد فى رجاله كتير بيحبوا يلعبوا بديلهم زي مواليد برج الجوزاء الى انا منهم :)عايز اقول ان اي انسان فى بدايه الجواز بيبقى عنده طموح وامل بناء اسره مستقره ده بيكون الهدف الاول فى اهداف تانيه طبعا وفى ضغوط بتطلع بتخلى الانسان يتخلى عن اهدافه ومبادئه ويدور على اهداف تانيه وكل واحد وقوه تحمله والبيئه المحيطه بيه والانسانه اللى معاه وخصوصا ان تلت اربع جوازات مصر صالونات والخلع والطلاق متوفرين وده مش وحش فحد ذاته بس بيتهيالى مادام هوه بيحبها وهيا بتحبه بغض النظر عن علاقته التانيه انا مش شايف بروبليم بس طبعا متنسيش اننا مجتمع ذكوري يعني انا هسمحله بالحق ده مش هسمح بيه ليها كانثى طبعاً هيا دي موروثات مجتمعنا ممكن تكون مش منطقيه عندك استعداد تغيري قولي رايك أحمد هتلر
أولا بالنسبة للرأي الأولاني
لو قلنا ان دي سيكولوجية الراجل الطبيعية ( ولو اني اشك في ان ربنا خلقه على الفطرة دي لان لو زي مابتقول الست مش هاتفهم حاجة زي كده فحاجة زي دي هاتقدي لخلافات واضطرابات في الزواج وده مش منطقى ان ربنا يوضع حاجة تاثر على اسمى رباط بين اتنين )
لكن احب اقول واذكر ان اساس الزواج هو الأمن والسكينة بين الاتنين فحد يقدر يجاوبني ويقولي لو كانت دي طبيعة وسيكولوجية المفروض نسلم بيها والستات مش بيفهموها المفروض نتعامل معاها ازاي والمفروض نحس بالأمان والثقة والاخلاص تاني ازاي ؟؟؟؟؟
لو في وصفة سهلة او لذيذة عشان الست تتخلص من كل الاحاسيس المؤلمة من القلم السخن اللى بتاخده على وشها لما جوزها يتجوز عليها فياريت تقولولنا لان معتقدش ان المفروض علينا هو التقبل بهدوء اقولكوا امتى الست تتقبل بهدوء او نظرتي لامتى بالظبط تبقى حاجة مبلوعة ان الراجل يتجوز على مراته لما يبقى في اسباب بجد للزواج ده مش مجرد فرفشة وتجديد يعني زوجته مريضة مثلا واسباب تانية في بعض الشيوخ بيعتبروها شروط اساسية لتعداد الزواج ومش بيسمحوا بالتعداد وخلاص بدون اسباب كمان لو هو موضوع عادي جدا والمفروض نتقبله الراجل ليه مبيروحش يقول لمراته قبل مايعمل حاجة زي كده ليه بيعملها في الدرى غير لو كان عارف اد ايه الحاجة دي بتجرح واد ايه بتهدم بيوت
بالنسبة للرأي الثاني
بان الحكاية سببها ان بعد الجواز وبعد ماالراجل حقق الاستقرار المطلوب لحياتة ضغوط الدنيا بتولد اسباب بتخليه يرغب في الزواج مرة تانية
اعتقد ان الاسباب دي مثلا ممكن تكون الرتابة والروتين والملل في الحياة الزوجية او الاحساس انه مربوط في ساقية او كلام من ده كتير معروف للمجتمع كله
فانا لي نظرية الراجل بيستسهل معلش سامحوني على الهجوم ده بس فكروا معايا هتلاقوا ان كلامي صح الراجل بيستسهل انه يخش في علاقة تانية او يدور على حب جديد او يتجاوب مع اول معجبة على اساس انه بيرجع الحيوية لحياته وهايحس باحساسات جميلة جدا من العلاقة اللى بيدخل فيها ومبيبقاش حاسس هو مودي نفسه لفين طب ليه سيادته بدل مايعمل كده مبيحاولش يبذل مجهود مع البني ادمة اللى اختارها ويحاول يكسر الروتين والرتابة ويبقى مجهود من الناحيتين وميعتبرش زي وجهة نظر كل المصريين ان دي مهمة الست انها لو معرفتش تخلى حياتهم على طول في تجديد وحيوية يبقى هي اللى فاشلة وهي اللى ضيعت جوزها من اديها وخلته يبص بره وزي مايكون ان الست دي عليها كل حاجة وليه ميشتركوش في اعادة الحب لبيتهم سوا ولا حرام يعني ياما الست لوحدها اللى تعمل كده ياما ابص لبره ؟؟؟؟
لو ابتدى الراجل المصري يبص للحل ده ويغير من معتقداته شوية اعتقد في بيوت كتير هاتحفظ من الهدم وقلة الراحة والقلق في مصر ولا ايه؟؟؟؟؟؟؟
|
